ਜਲੰਧਰ, 30-10-2021 (ਮੀਨਾਕਸ਼ੀ ਕਸ਼ਯਪ) – ਆਲ ਇੰਡੀਆ ਸਮਾਲ ਨਿਊਜ਼ ਪੇਪਰਜ਼ ਕੌਂਸਲ ਦੀ ਸਲਾਨਾ ਕਾਨਫਰੰਸ ਕੌਂਸਲ ਦੇ ਪ੍ਰਧਾਨ ਸ. ਬੇਅੰਤ ਸਿੰਘ ਸਰਹੱਦੀ ਦੀ ਪ੍ਰਧਾਨਗੀ ਹੇਠ 30 ਅਕਤੂਬਰ 2021 ਨੂੰ ਪੰਜਾਬ ਪ੍ਰੈਸ ਕਲੱਬ ਜਲੰਧਰ ਵਿਖੇ ਹੋਈ, ਜਿਸ ਵਿਚ ਪੰਜਾਬ ਭਰ ਤੋਂ ਵੱਖ-ਵੱਖ ਸਮਾਚਾਰ ਪੱਤਰਾਂ ਦੇ ਮਾਲਕਾਂ ਅਤੇ ਸੰਪਾਦਕਾਂ ਨੇ ਹਿੱਸਾ ਲਿਆ। ਸਵੇਰੇ 11 ਵਜੇ ਤੱਕ ਸਾਰੇ ਮੈਂਬਰ ਸਾਹਿਬਾਨ ਪਹੁੰਚ ਗਏ ਸੀ। ਕੌਂਸਲ ਦੇ ਜਨਰਲ ਸਕੱਤਰ ਮੇਜਰ ਜਗਜੀਤ ਸਿੰਘ ਰਿਸ਼ੀ ਨੇ ਸਲਾਨਾ ਕਾਨਫਰੰਸ ਦਾ ਏਜੰਡਾ ਰੱਖਦੇ ਹੋਏ ਆਏ ਹੋਏ ਮੈਂਬਰਾਂ ਦਾ ਸਵਾਗਤ ਕੀਤਾ। ਕਾਨਫਰੰਸ ਦੇ ਪਹਿਲੇ ਹਿੱਸੇ ਦੌਰਾਨ ਵੱਖ-ਵੱਖ ਸਮਾਚਾਰ ਪੱਤਰਾਂ ਦੇ ਮਾਲਕਾਂ ਨੇ ਛੋਟੇ ਸਮਾਚਾਰ ਪੱਤਰਾਂ ਨੂੰ ਪੇਸ਼ ਆ ਰਹੀਆਂ ਔਕੜਾਂ ਬਾਰੇ ਆਪਣੇ-ਆਪਣੇ ਵਿਚਾਰ ਪੇਸ਼ ਕੀਤੇ।
ਇਸ ਦੌਰਾਨ ਕੋਟਕਪੂਰਾ ਤੋਂ ਮਾਲਵਾ ਨਿਊਜ਼ ਦੇ ਮਾਲਕ ਹੁਕਮ ਚੰਦ, ਰਣਜੀਤ ਪੇਪਰ ਦੇ ਮਾਲਕ ਇੰ. ਕਰਨੈਲ ਸਿੰਘ, ਪਬਲਿਕ ਟਾਈਮਜ਼ ਤੋਂ ਪੁਸ਼ਪਿੰਦਰ ਕੌਰ, ਬਲਜੀਤ ਸਿੰਘ ਸੰਘਾ, ਗੀਤਾ ਵਰਮਾ, ਡਾ. ਸਰਬਜੀਤ ਸਿੰਘ ਛੀਨਾ ਅੰਮ੍ਰਿਤਸਰ, ਅਸ਼ੋਕ ਖੰਨਾ ਜਗਤ ਵਾਣੀ, ਕੁਲਦੀਪ ਸਿੰਘ ਬੇਦੀ ਮਾਸਿਕ ਖੁਸ਼ਖਬਰੀ, ਪਥਿਕ ਸੰਦੇਸ਼ ਤੋਂ ਰਾਕੇਸ਼ ਸੈਨ, ਯੁਗ ਬੋਧ ਤੋਂ ਕੈਲਾਸ਼ ਠੁਕਰਾਲ, ਮਲੇਰਕੋਟਲਾ ਤੋਂ ਪਹੁ ਫੁਟਾਲਾ ਦੇ ਮਾਲਕ ਮੁਹਮੰਦ ਯੂਸੁਫ ਅੰਸਾਰੀ, ਮਸੀਹੀ ਸੰਸਾਰ ਤੋਂ ਫਰੈਡੀ ਜੋਸਫ, ਤੀਰ ਨਿਸ਼ਾਨੇ ਤੇ ਦੇ ਮਾਲਕ ਰਾਕੇਸ਼ ਮਹਾਜਨ, ਕਸ਼ਯਪ ਕ੍ਰਾਂਤੀ ਦੇ ਮਾਲਕ ਨਰਿੰਦਰ ਕਸ਼ਯਪ, ਸੁਭਾਸ਼ ਚੰਦਰ ਨਿਸਤਾਂਦਰਾ, ਵੈਲਕਮ ਪੰਜਾਬ ਤੋਂ ਅਮਰਪ੍ਰੀਤ ਸਿੰਘ, ਦੁਆਬਾ ਹੈਡਲਾਈਨ ਤੋਂ ਰਾਮ ਸਿੰਘ ਔਲਖ ਆਦਿ ਮੈਂਬਰਾਂ ਨੇ ਆਪਣੇ ਵਿਚਾਰ ਪੇਸ਼ ਕਰਦੇ ਹੋਏ ਛੋਟੇ ਸਮਾਚਾਰ ਪੱਤਰਾਂ ਦੀਆਂ ਮੁਸ਼ਕਲਾਂ ਦੱਸੀਆਂ। ਇਹਨਾਂ ਵਿਚੋਂ ਮੁੱਖ ਤੌਰ ਤੇ ਡਾਕ ਨਾ ਪਹੁੰਚਣਾ, ਸਰਕਾਰ ਵੱਲੋਂ ਛੋਟੇ ਸਮਾਚਾਰ ਪੱਤਰਾਂ ਨੂੰ ਇਸ਼ਤਿਹਾਰ ਨਾ ਦੇਣਾ, ਛੋਟੇ ਸਮਾਚਾਰ ਪੱਤਰਾਂ ਦੇ ਮਾਲਕਾਂ ਨੂੰ ਕੋਈ ਸਹੂਲਤ ਨਾ ਮਿਲਣਾ ਆਦਿ ਬਾਰੇ ਵਿਚਾਰ ਪੇਸ਼ ਕੀਤੇ ਗਏ। ਮੇਜਰ ਜਗਜੀਤ ਸਿੰਘ ਰਿਸ਼ੀ ਨੇ ਨਾਲ ਦੇ ਨਾਲ ਹੀ ਕੌਂਸਲ ਵੱਲੋਂ ਕੀਤੇ ਗਏ ਉਪਰਾਲੇ ਅਤੇ ਸਰਕਾਰ ਵੱਲੋਂ ਦਿੱਤੀ ਜਾਣ ਵਾਲੀਆਂ ਸਹੂਲਤਾਂ, ਆਰ.ਐਨ.ਆਈ. ਦੀਆਂ ਗਾਈਡਲਾਈਨਾਂ ਬਾਰੇ ਵੀ ਦੱਸਿਆ ਗਿਆ।