22  ਅਪ੍ਰੈਲ ਨੂੰ ਜਿਸ ਕਿਸੇ ਨੇ ਵੀ ਸ਼੍ਰੀ ਜਤਿੰਦਰ ਕੁਮਾਰ ਕੁੱਕੂ ਜੀ ਦੀ ਮੌਤ ਦੀ ਖਬਰ ਸੁਣੀ ਤਾਂ ਉਸਦੇ ਮੁੰਹ ‘ਚੋਂ ਇਕੋ ਗੱਲ ਨਿਕਲੀ, ”ਕੁੱਕੂ ਯਾਰਾਂ ਦਾ ਯਾਰ ਸੀ.”  ਵੈਸੇ ਤਾਂ ਕਿਸੇ ਨੂੰ ਇਸ ਗੱਲ ਦਾ ਯਕੀਨ ਨਹੀਂ ਆ ਰਿਹਾ ਸੀ ਕਿ ਕੱਲ ਸ਼ਾਮ ਤੱਕ ਉਹਨਾਂ ਨਾਲ ਹੱਸਣ-ਖੇਡਣ ਵਾਲਾ ਉਹਨਾਂ ਦਾ ਯਾਰ ਨਹੀਂ ਰਿਹਾ, ਪਰ ਅਜਿਹੀਆਂ ਖਬਰਾਂ ਝੂਠ ਨਹੀਂ ਹੁੰਦੀਆਂ.
ਜਲੰਧਰ ਸ਼ਹਿਰ ‘ਚ ਟਾਂਡਾ ਰੋਡ ਤੇ ਮਸ਼ਹੂਰ ਫੱਟੇ-ਬੱਲੀਆਂ ਵਾਲਾ ਕੁੱਕੂ ਆਪਣੇ ਅਸਲੀ ਨਾਮ ਜਤਿੰਦਰ ਕੁਮਾਰ ਤੋਂ ਘੱਟ ਜਾਣਿਆ ਜਾਂਦਾ ਸੀ ਅਤੇ ਕੁੱਕੂ ਨਾਮ ਨਾਲ ਜਿਆਦਾ ਮਸ਼ਹੂਰ ਸੀ. ਰਾਜੇਸ਼ ਖੰਨਾ ਦੇ ਫੈਨ ਅਤੇ ਪੁਰਾਣੇ ਗਾਣਿਆਂ ਦੇ ਸ਼ੌਕੀਨ ਕੁੱਕੂ ਜੀ ਆਪਣੀ ਜਵਾਨੀ ਦੇ ਦਿਨਾਂ ‘ਚ ਰਾਜੇਸ਼ ਖੰਨਾ ਦੇ ਨਾਮ ਨਾਲ ਵੀ ਮਸ਼ਹੂਰ ਸਨ. ਲਕਸ਼ਮੀ ਪੁਰਾ ਜਲੰਧਰ ‘ਚ ਏ.ਐਨ. ਸ਼ਟਰਿੰਗ ਹਾਊਸ ਅਤੇ ਮਾਇਆ ਸ਼ਟਰਿੰਗ ਸਟੋਰ ਦੇ ਮਾਲਕ ਕੁੱਕੂ ਜੀ ਨੇ ਹੀ ਜਲੰਧਰ ‘ਚ ਸਭ ਤੋਂ ਪਹਿਲਾਂ ਸਟੀਲ ਸ਼ਟਰਿੰਗ ਦਾ ਬਿਜ਼ਨਸ ਸ਼ੁਰੂ ਕੀਤਾ ਸੀ. ਉਸ ਸਮੇਂ ਆਮ ਕਰਕੇ ਲੱਕੜ ਦੇ ਫੱਟੇ-ਬੱਲੀਆਂ ਦੀ ਹੀ ਸ਼ਟਰਿੰਗ ਹੁੰਦੀ ਸੀ. ਕੁੱਕੂ ਜੀ ਇਕ ਵਾਰ ਦਿੱਲੀ ਗਏ ਤਾਂ ਉਥੇ ਸਟੀਲ ਦੀ ਸ਼ਟਰਿੰਗ ਦੇਖ ਕੇ ਇਹਨਾਂ ਦੇ ਦਿਲ ‘ਚ ਖਿਆਲ ਆਇਆ ਕਿ ਜਲੰਧਰ ‘ਚ ਵੀ ਇਹ ਕੰਮ ਸ਼ੁਰੂ ਕੀਤਾ ਜਾਵੇ. ਇੱਥੇ ਆ ਕੇ ਇਹਨਾਂ ਨੇ ਸਟੀਲ ਦੀਆਂ ਪਲੇਟਾਂ ਬਣਵਾ ਲਈਆਂ ਤਾਂ ਦੂਜੇ ਸ਼ਟਰਿੰਗ ਵਾਲੇ ਕਹਿੰਦੇ ਸੀ ਕਿ ਇਹ ਵੱਡੇ ਸ਼ਹਿਰਾਂ ਵਾਲਾ ਕੰਮ ਹੈ, ਇੱਥੇ ਨਹੀਂ ਚੱਲਣਾ. ਪਰ ਕੁੱਕੂ ਜੀ ਤਾਂ ਸਮੇਂ ਤੋਂ ਅੱਗੇ ਅਡਵਾਂਸ ਸੋਚ ਨਾਲ ਬਿਜ਼ਨਸ ਕਰਨ ਦਾ ਮਨ ਬਣਾ ਚੁੱਕੇ ਸੀ. ਹੌਲੀ-ਹੌਲੀ ਇਹਨਾਂ ਦਾ ਬਿਜ਼ਨਸ ਬਹੁਤ ਫੈਲ ਗਿਆ ਅਤੇ ਇਹਨਾਂ ਪੰਜਾਬ ਦੇ ਵੱਖ-ਵੱਖ ਸ਼ਹਿਰਾਂ ਤੋਂ ਅਲਾਵਾ ਹਿਮਾਚਲ ਵਿਚ ਵੀ ਬਹੁਤ ਵੱਡੇ ਪ੍ਰੋਜੈਕਟਾਂ ਨੂੰ ਸਟੀਲ ਸ਼ਟਰਿੰਗ ਸਪਲਾਈ ਕੀਤੀ. ਛੋਟੀ ਉਮਰ ‘ਚ ਹੀ ਕੁੱਕੂ ਜੀ ਨੇ ਆਪਣੇ ਨਾਨਾ ਜੀ ਨਾਲ ਇੱਥੇ ਰੇਤਾ-ਬਜਰੀ ਅਤੇ ਫੱਟੇ-ਬੱਲੀਆਂ ਦਾ ਕੰਮ ਸ਼ੁਰੂ ਕੀਤਾ ਸੀ. ਅਣਥੱਕ ਮਿਹਨਤ ਅਤੇ ਅੱਗੇ ਵਧਣ ਦੀ ਚਾਹਤ ਨੇ ਇਹਨਾਂ ਵਾਸਤੇ ਤਰੱਕੀ ਦੇ ਨਵੇਂ ਰਾਸਤੇ ਖੋਲ ਦਿੱਤੇ.
ਬਿਜ਼ਨਸ ਤੋਂ ਅਲਾਵਾ ਸ਼੍ਰੀ ਜਤਿੰਦਰ ਕੁਮਾਰ ਜੀ ਆਪਣੇ ਸਮਾਜਿਕ ਦਾਇਰੇ ਨੂੰ ਵੀ ਲਗਾਤਾਰ ਵਧਾਂਦੇ ਰਹੇ. ਜਿੱਥੇ ਇਹ ਸਟੀਲ ਸ਼ਟਰਿੰਗ ਐਸੋਸੀਏਸ਼ਨ ਜਲੰਧਰ ਦੇ ਕੈਸ਼ੀਅਰ ਸਨ, ਉਥੇ ਨਾਲ ਹੀ ਕਈ ਸਮਾਜਿਕ ਸੰਸਥਾਵਾਂ ਨੂੰ ਵੀ ਵਧ ਚੜ੍ਹ ਕੇ ਸਹਿਯੋਗ ਕਰਦੇ ਹੁੰਦੇ ਸੀ. ਹਰ ਸਾਲ ਦੋ ਵਾਰ ਇਹਨਾਂ ਨੇ ਲੰਗਰ ਲਗਾਉਣਾ ਅਤੇ ਸੇਵਾ ਕਰਨੀ. ਕਸ਼ਯਪ ਰਾਜਪੂਤ ਸਮਾਜ ਦੀ ਭਲਾਈ ਵਾਸਤੇ ਬਣੀ ਸੰਸਥਾ ਕਸ਼ਯਪ ਰਾਜਪੂਤ ਮੈਂਬਰਸ ਐਸੋਸੀਏਸ਼ਨ ਦੇ ਇਹ ਫਾਉਂਡਰ ਮੈਂਬਰ ਹਨ. ਧਾਰਮਿਕ ਕੰਮਾਂ ਵਿਚ ਵੀ ਪੂਰਾ ਸਹਿਯੋਗ ਕਰਦੇ ਸਨ. ਨਾਂਗਲਾ ਜਠੇਰਿਆਂ ਦੀ ਕਮੇਟੀ ਦੇ ਵੀ ਇਹ ਸਰਗਰਮ ਮੈਂਬਰ ਸਨ. ਇਸ ਸਾਲ ਇਹਨਾਂ ਨੇ ਹੀ ਜਠੇਰਿਆਂ ਦੇ ਅਸਥਾਨ ‘ਤੇ ਰਾਤ ਰੁਕਣ ਵਾਲੇ ਸ਼ਰਧਾਲੂਆਂ ਲਈ ਪਹਿਲੀ ਵਾਰ ਬਿਸਤਰੇ ਅਤੇ ਸੋਣ ਦਾ ਪ੍ਰਬੰਧ ਵਧੀਆ ਢੰਗ ਨਾਲ ਕੀਤਾ. ਕਮੇਟੀ ਮੈਂਬਰਾਂ ਨਾਲ ਮਿਲ ਕੇ ਜਠੇਰਿਆਂ ਦੇ ਅਸਥਾਨ ਵਾਸਤੇ ਕਈ ਕੰਮ ਕੀਤੇ. ਕਰਮਾ ਵੱਲੋਂ ਕਰਵਾਏ ਜਾਣ ਵਾਲ ਪਰਿਵਾਰ ਸੰਮੇਲਨਾਂ ‘ਚ  ਇਹਨਾਂ ਦਾ ਪੂਰਾ ਸਾਥ ਹੁੰਦਾ ਸੀ. ਸੰਨ 2008 ਦੇ ਪਰਿਵਾਰ ਸੰਮੇਲਨ ‘ਚ ਦੇਣ ਵਾਲੇ ਸਾਰੇ ਮੋਮੈਂਟੋ ਇਹਨਾਂ ਨੇ ਸਪੋਂਸਰ ਕੀਤੇ ਸਨ.
ਜਦੋਂ ਕੋਈ ਵੀ ਮਹਿਮਾਨ ਇਹਨਾਂ ਕੋਲ ਆ ਜਾਂਦਾ ਸੀ ਤਾਂ ਇਹਨਾਂ ਨੂੰ ਚਾਅ ਚੜ੍ਹ ਜਾਂਦਾ ਸੀ. ਆਏ ਹੋਏ ਮਹਿਮਾਨ ਚਾਹੇ ਉਹ ਇਹਨਾਂ ਦਾ ਰਿਸ਼ਤੇਦਾਰ ਹੋਵੇ, ਦੋਸਤ ਹੋਵੇ ਜਾਂ ਕੋਈ ਵੈਸੇ ਹੀ ਆਇਆ ਹੋਵੇ ਉਹ ਕੁੱਕੂ ਜੀ ਦੀ ਕੀਤੀ ਹੋਈ ਸੇਵਾ ਦਾ ਕਾਇਲ ਹੋ ਜਾਂਦਾ ਸੀ. ਕੁੱਕੂ ਜੀ ਖੁੱਲੇ ਸੁਭਾਅ ਤੇ ਸੱਚੇ ਦਿਲੋਂ ਮਹਿਮਾਨ ਨਵਾਜੀ ਕਰਦੇ ਸੀ. ਹਰ ਕੋਈ ਇਹਨਾਂ ਦੀ ਇਸ ਖਾਸੀਅਤ ਬਾਰੇ ਚਰਚਾ ਜਰੂਰ ਕਰਦਾ ਹੈ.
ਇਸੇ ਸਾਲ 28 ਫਰਵਰੀ ਨੂੰ ਇਹਨਾਂ ਨੇ ਆਪਣੇ ਵਿਆਹ ਦੀ 40ਵੀਂ ਸਾਲਗਿਰਹ ਮਨਾਈ. ਘਰ ‘ਚ ਸਾਂਈ ਸੰਧਿਆ ਹੋਈ ਅਤੇ ਖੂਬ ਰੌਣਕਾਂ ਲਗਾਈਆਂ. ਇਹਨਾਂ ਆਪਣੀ ਧਰਮ-ਪਤਨੀ ਸ਼੍ਰੀਮਤੀ ਪਰਾਜਿਤਾ ਨਾਲ ਬਿਤਾਏ ਹੋਏ ਪਲਾਂ ਨੂੰ ਯਾਦ ਕਰਦੇ ਹੋਏ ਖੂਬ ਰੌਣਕਾਂ ਲਗਾਈਆਂ.  ਕੁੱਕੂ ਜੀ ਦੇ ਬੇਟੇ ਸ਼੍ਰੀ ਜਗਦੀਪ ਕੁਮਾਰ ਅਤੇ ਮੁਨੀਸ਼ ਕੁਮਾਰ ਜੀ ਵੀ ਇਹਨਾਂ ਦੇ ਪਾਏ ਹੋਏ ਪੂਰਨਿਆਂ ‘ਤੇ ਅੱਗੇ ਵਧ ਰਹੇ ਹਨ ਅਤੇ ਆਪਣੇ ਪਿਤਾ ਦਾ ਨਾਮ ਰੋਸ਼ਨ ਕਰ ਰਹੇ ਹਨ. ਇਹਨਾਂ ਦੀ ਵੱਡੀ ਬੇਟੀ ਮੋਨਿਕਾ ਜਲੰਧਰ ਸ਼ਹਿਰ ‘ਚ ਮਸ਼ਹੂਰ ਸੋਹਣ ਲਾਲ ਕੈਮਰੇ ਵਾਲਿਆਂ ਦੇ ਬੇਟੇ ਵਿਕਰਮਜੀਤ ਨਾਲ ਵਿਆਹੀ ਹੋਈ ਹੈ ਜਦਕਿ ਛੋਟੀ ਬੇਟੀ ਪੂਜਾ ਦਾ ਵਿਆਹ ਪਿਛਲੇ ਸਾਲ ਹੀ ਫਿਰੋਜ਼ਪੁਰ ਦੇ ਸ਼ੈਲੇਂਦਰ ਨਾਲ ਕੀਤਾ ਸੀ. ਵੱਡਾ ਬੇਟਾ ਜਗਦੀਪ ਜਲੰਧਰ ‘ਚ ਵਿਆਹਿਆ ਹੋਇਆ ਹੈ ਅਤੇ ਉਸਦਾ ਇਕ ਬੇਟਾ ਰਿਆਂਸ਼ ਹੈ ਜੋ ਆਪਣੀ ਸ਼ਰਾਰਤਾਂ ਨਾਲ ਦਾਦੂ ਜੀ ਦਾ ਦਿਲ ਲਗਾਈ ਰੱਖਦਾ ਸੀ.
ਕੁੱਕੂ ਜੀ ਨਾਲ ਬਿਤਾਏ ਹੋਏ ਪਲ ਅੱਜ ਵੀ ਸਾਨੂੰ ਯਾਦ ਆਉਂਦੇ ਹਨ ਕਿ ਕਿਸ ਤਰ੍ਹਾਂ ਉਹਨਾਂ ਦੇ ਚਿਹਰੇ ‘ਤੇ ਹਰ ਸਮੇਂ ਮੁਸਕਾਨ ਰਹਿੰਦੀ ਸੀ. ਕਈ ਵਾਰ ਸ਼ਾਮ ਨੂੰ ਉਹਨਾਂ ਦੇ ਦਫਤਰ ‘ਚ ਇਕੱਠੇ ਬੈਠ ਕੇ ਚਾਹ ਪੀਂਦੇ ਸਮੇਂ ਕਈ ਤਰ੍ਹਾਂ ਦੇ ਵਿਚਾਰ-ਵਟਾਂਦਰੇ ਹੋ ਜਾਂਦੇ ਸੀ. ਆਪਣੀ ਤਕਲੀਫ ਨੂੰ ਵੀ ਉਹ ਹੱਸ ਕੇ ਸਹਿੰਦੇ ਸੀ ਅਤੇ ਹਰ ਇਕ ਨਾਲ ਖੁਸ਼ ਹੋ ਕੇ ਮਿਲਦੇ ਸੀ. 16 ਅਪ੍ਰੈਲ ਨੂੰ ਆਪਣੇ ਸਾਥੀ ਸ਼੍ਰੀ ਵਿਜੇ ਕੁਮਾਰ ਜੀ ਦੇ ਬੇਟੇ ਦੇ ਵਿਆਹ ਮੌਕੇ ਇਕੱਠੇ ਹੋ ਕੇ ਖੂਬ ਮਸਤੀ ਕਰ ਰਹੇ ਸੀ ਤਾਂ ਇਹ ਅੰਦਾਜਾ ਹੀ ਨਹੀਂ ਸੀ ਕਿ ਸਾਡੇ ਯਾਰ ਨੇ ਐਨੀ ਜਲਦੀ ਸਾਨੂੰ ਛੱਡ ਜਾਣਾ ਹੈ. ਜਦੋਂ ਅਸੀਂ ਸਾਰੇ ਸੈਲਫੀ ਲੈ ਰਹੇ ਸੀ ਤਾਂ ਉਹਨਾਂ ਕਿਹਾ ਕਿ ਮੇਰੇ ਨਾਲ ਵੀ ਸੈਲਫੀ ਲਓ ਯਾਰ.
ਕੁੱਕੂ ਜੀ ਵਰਗਾ ਹੰਸਮੁੱਖ, ਦਿਲਦਾਰ, ਦਿਲੋਂ ਸੇਵਾ ਕਰਨ ਵਾਲਾ ਅਤੇ ਯਾਰਾਂ ਦਾ ਯਾਰ ਹੁਣ ਨਹੀਂ ਲੱਭਣਾ. ਉਹ ਇਕ ਅਜਿਹਾ ਖਾਲੀ ਥਾਂ ਛੱਡ ਗਏ ਹਨ ਜੋ ਕਦੇ ਨਹੀਂ ਭਰਿਆ ਜਾ ਸਕਦਾ. ਉਹਨਾਂ ਦੀ ਕਮੀ ਹਮੇਸ਼ਾ ਮਹਿਸੂਸ ਹੁੰਦੀ ਰਹੇਗੀ.
ਨਰਿੰਦਰ ਕਸ਼ਯਪ- ਪ੍ਰਮੁੱਖ ਕਸ਼ਯਪ ਕ੍ਰਾਂਤੀ ਪੱਤ੍ਰਿਕਾ